Shree ganapati atharvashirsha - harih om namaste ganapataye

 श्री गणपत्यथर्वशीर्ष

|| shri ganapatyatharvashirsha ||

॥ शान्ति पाठ ॥

|| shanti patha ||

ॐ भद्रं कर्णेभिः शृणुयाम देवाः ।

भद्रं पश्येमाक्षभिर्यजत्राः ॥

स्थिरैरङ्गैस्तुष्टुवांसस्तनूभिः ।

व्यशेम देवहितं यदायुः ॥

om bhadram karnebhih shrinuyama devah |
bhadram pashyemaksha-bhiryajatrah ||
sthirairangais-tushtuvan-sastanubhih |

vyashema devahitam yadayuh ||

ॐ स्वस्ति न इन्द्रो वृद्धश्रवाः ।

स्वस्ति नः पूषा विश्ववेदाः ॥

स्वस्तिनस्तार्क्ष्यो अरिष्टनेमिः ।

स्वस्ति नो बृहस्पतिर्दधातु ॥

om svasti na indro vriddha-shravah |
svasti nah pusha vishvavedah ||
svastina-starkshyo arishtanemih |
svasti no brihaspatir-dadhatu ||

ॐ तन्मामवतु तद् वक्तारमवतु अवतु माम् अवतु वक्तारम् ।

ॐ शान्तिः शान्तिः शान्तिः ॥

om tanmam-avatu tad vaktaramavatu avatu mam avatu vaktaram |
om shantih shantih shantih ||

|| upanishat ||

॥ उपनिषत् ॥

हरिः ॐ नमस्ते गणपतये ।

त्वमेव प्रत्यक्षं तत्त्वमसि ॥

त्वमेव केवलं कर्ताऽसि ।

त्वमेव केवलं धर्ताऽसि ॥

त्वमेव केवलं हर्ताऽसि ।

त्वमेव सर्वं खल्विदं ब्रह्मासि ॥

त्वं साक्षादात्माऽसि नित्यम् ॥ १ ॥

harih om namaste ganapataye |

tvameva pratyaksham tattvamasi ||
tvameva kevalam karta'si |
tvameva kevalam dharta'si ||
tvameva kevalam harta'si |
tvameva sarvam khalvidam brahmasi ||
tvam sakshadatma'si nityam || 1 ||

॥ स्वरूप तत्त्व ॥

|| svarupa tattva ||

ऋतं वच्मि  ॥

सत्यं वच्मि ॥ २ ॥

ritam vachmi ||
satyam vachmi || 2 ||

अव त्वं माम् ।

अव वक्तारम् ॥

अव श्रोतारम् ।

अव दातारम् ॥

अव धातारम् ।

अवानूचानमव शिष्यम् ॥

अव पश्चात्तात् ।

अव पुरस्तात् ॥

अवोत्तरात्तात् ।

अव दक्षिणात्तात् ॥

अव चोर्ध्वात्तात् ।

अवाधरात्तात् ॥

सर्वतो मां पाहि पाहि समन्तात् ॥ ३ ॥

ava tvam mam |
ava vakta-ram ||
ava shrota-ram |
ava data-ram ||
ava dhata-ram |
avanuchan-amava shishyam ||
ava pashchat-tat |
ava puras-tat ||
av-ottarat-tat |
ava dakshinat-tat ||
ava chordhvat-tat |
avadharat-tat ||
sarvato mam pahi pahi samantat || 3 ||

त्वं वाङ्ग्मयस्त्वं चिन्मयः ।

त्वमानन्दमयस्त्वं ब्रह्ममयः ॥

त्वं सच्चिदानन्दाद्वितीयोऽसि ।

त्वं प्रत्यक्षं ब्रह्मासि ॥

त्वं ज्ञानमयो विज्ञानमयोऽसि ॥ ४ ॥

tvam vangmayas-tvam chinmayah |
tvam anandamayas-tvam brahmamayah ||
tvam sachchidananda-dvitiyo'si |
tvam pratyaksham brahmasi ||
tvam jnanamayo vijnanamayo'si || 4 ||

सर्वं जगदिदं त्वत्तो जायते ।

सर्वं जगदिदं त्वत्तस्तिष्ठति ॥

सर्वं जगदिदं त्वयि लयमेष्यति ।

सर्वं जगदिदं त्वयि प्रत्येति ॥

त्वं भूमिरापोऽनलोऽनिलो नभः ॥

त्वं चत्वारि वाक्पदानि ॥ ५ ॥

sarvam jagadidam tvatto jayate |
sarvam jagadidam tvattas-tishthati ||
sarvam jagadidam tvayi layameshyati |
sarvam jagadidam tvayi pratyeti ||
tvam bhumirapo'nalo'nilo nabhah ||
tvam chatvari vakpadani || 5 ||

त्वं गुणत्रयातीतः ।

त्वं देहत्रयातीतः ॥

त्वं कालत्रयातीतः ।

त्वं मूलाधारः स्थिथोऽसि नित्यम् ॥

त्वं शक्तित्रयात्मकः ।

त्वां योगिनो ध्यायन्ति नित्यम् ॥

त्वं ब्रह्मा त्वं विष्णुस्त्वं रुद्रस्त्वं इन्द्रस्त्वं अग्निस्त्वं वायुस्त्वं सूर्यस्त्वं चन्द्रमास्त्वं ब्रह्मभूर्भुवःस्वरोम् ॥ ६ ॥

tvam gunatrayatitah |
tvam dehatrayatitah ||
tvam kalatrayatitah |
tvam muladharah sthitho'si nityam ||
tvam shaktitrayatmakah |
tvam yogino dhyayanti nityam ||
tvam brahma tvam vishnustvam rudrastvam indrastvam agnistvam vayustvam suryastvam chandramastvam brahma-bhur-bhuvah-svarom || 6 ||

॥ गणेश मन्त्र ॥

|| ganesha mantra ||

गणादिं पूर्वमुच्चार्य वर्णादिं तदनन्तरम् ।

अनुस्वारः परतरः ॥

अर्धेन्दुलसितम् ।

तारेण ऋद्धम् ॥

एतत्तव मनुस्वरूपम् ।

गकारः पूर्वरूपम् ॥

अकारो मध्यमरूपम् ।

अनुस्वारश्चान्त्यरूपम् ॥

बिन्दुरुत्तररूपम् ।

नादः सन्धानम् ॥

संहितासन्धिः ।

सैषा गणेशविद्या ॥

गणकऋषिः ।

निचृद्गायत्रीच्छन्दः ॥

गणपतिर्देवता ॥

ॐ गं गणपतये नमः ॥ ७ ॥

ganadim purvam-uchcharya varnadim tada-nantaram |
anusvarah paratarah ||
ardhendu-lasitam |
tarena ruddham ||
etat-tava manusva-rupam |
gakarah purva-rupam ||
akaro madhyama-rupam |
anusvarashch-antya-rupam ||
bindu-ruttara-rupam |
nadah sandhanam ||
sanhita-sandhih |
saisha ganesha-vidya ||
ganakarishih |
nichrud-gayatri-chchhandah ||
ganapatir-devata ||
om gam ganapataye namah || 7 ||

॥ गणेश गायत्री ॥

|| ganesha gayatri ||

एकदन्ताय विद्महे ।

वक्रतुण्डाय धीमहि ॥

तन्नो दन्तिः प्रचोदयात् ॥ ८ ॥

ekadantaya vidmahe |
vakratundaya dhimahi ||
tanno dantih prachodayat || 8 ||

॥ गणेश रूप ॥

|| ganesha rupa ||

एकदन्तं चतुर्हस्तं पाशमङ्कुशधारिणम् ।

रदं च वरदं हस्तैर्बिभ्राणं मूषकध्वजम् ॥

रक्तं लम्बोदरं शूर्पकर्णकं रक्तवाससम् ।

रक्तगन्धानुलिप्ताङ्गं रक्तपुष्पैः सुपूजितम् ॥

भक्तानुकम्पिनं देवं जगत्कारणमच्युतम् ।

आविर्भूतं च सृष्ट्यादौ प्रकृतेः पुरुषात्परम् ॥

एवं ध्यायति यो नित्यं स योगी योगिनां वरः ॥ ९ ॥

ekadantam chaturhastam pasham-ankusha-dharinam |
radam cha varadam hastair-bibhranam mushakadhvajam ||
raktam lambodaram shurpakarnakam raktavasasam |
rakta-gandhanu-liptangam rakta-pushpaih supujitam ||
bhaktanu-kampinam devam jagat-karanam-achyutam |
avirbhutam cha srishtyadau prakriteh purushat-param ||
evam dhyayati yo nityam sa yogi yoginam varah || 9 ||

॥ अष्ट नाम गणपति ॥

नमो व्रातपतये ।

नमो गणपतये ॥

नमः प्रमथपतये ।

नमस्तेऽस्तु लम्बोदरायैकदन्ताय ॥

विघ्ननाशिने शिवसुताय ।

श्रीवरदमूर्तये नमो नमः ॥ १० ॥

|| ashta nama ganapati ||

namo vratapataye |
namo ganapataye ||
namah pramathapataye |
namaste'stu lambodaray-aikadantaya ||
vighnanashine shivasutaya |
shri-varadamurtaye namo namah || 10 ||

॥ फलश्रुति ॥

एतदथर्वशीर्षं योऽधीते ।

स ब्रह्मभूयाय कल्पते ॥

स सर्वतः सुखमेधते ।

स सर्व विघ्नैर्नबाध्यते ॥

स पञ्चमहापापात्प्रमुच्यते ।

सायमधीयानो दिवसकृतं पापं नाशयति ॥

प्रातरधीयानो रात्रिकृतं पापं नाशयति ।

सायम्प्रातः प्रयुञ्जानो अपापो भवति ॥

सर्वत्राधीयानोऽपविघ्नो भवति ।

धर्मार्थकाममोक्षं च विन्दति ॥

इदमथर्वशीर्षमशिष्याय न देयम् ।

यो यदि मोहाद्दास्यति स पापीयान् भवति ॥

सहस्रावर्तनात् यं यं काममधीते तं तमनेन साधयेत् ॥ ११ ॥

|| phalashruti ||

etad-atharvashirsham yo'dhite |
sa brahmabhuyaya kalpate ||
sa sarvatah sukha-medhate |
sa sarva vighnair-na-badhyate ||
sa pancha-mahapapat-pramuchyate |
sayam-adhiyano divasakritam papam nashayati ||
pratar-adhiyano ratrikritam papam nashayati |
sayampratah prayunjano apapo bhavati ||
sarvatra-dhiyano'pavighno bhavati |
dharmartha-kama-moksham cha vindati ||
idam-atharvashirsham-ashishyaya na deyam |
yo yadi mohad-dasyati sa papiyan bhavati ||
sahasravartanat yam yam kamam-adhite tam tamanena sadhayet || 11 ||

अनेन गणपतिमभिषिञ्चति स वाग्मी भवति ॥

चतुर्थ्यामनश्नन् जपति स विद्यावान् भवति ।

स यशोवान् भवति ।

इत्यथर्वणवाक्यम् ॥

ब्रह्माद्याचरणं विद्यात् न बिभेति कदाचनेति ॥ १२ ॥

anena ganapatim-abhishinchati sa vagmi bhavati ||
chaturthyam-anashnan japati sa vidyavan bhavati |
sa yashovan bhavati |
ityatharvana-vakyam ||
brahmadya-charanam vidyat na bibheti kadachaneti || 12 ||

यो दूर्वाङ्कुरैर्यजति स वैश्रवणोपमो भवति ।

यो लाजैर्यजति स यशोवान् भवति ॥

स मेधावान् भवति ।

यो मोदकसहस्रेण यजति ॥

स वाञ्छितफलमवाप्नोति ।

यः साज्यसमिद्भिर्यजति ॥

स सर्वं लभते स सर्वं लभते ॥ १३ ॥

yo durvankur-airyajati sa vaishravano-pamo bhavati |
yo lajairyajati sa yashovan bhavati ||
sa medhavan bhavati |
yo modaka-sahasrena yajati ||
sa vanchhita-phalam-avapnoti |
yah sajya-samidbhir-yajati ||
sa sarvam labhate sa sarvam labhate || 13 ||

अष्टौ ब्राह्मणान् सम्यग्ग्राहयित्वा सूर्यवर्चस्वी भवति ।

सूर्यगृहे महानद्यां प्रतिमासन्निधौ वा जप्त्वा सिद्धमन्त्रो भवति ॥

महाविघ्नात्प्रमुच्यते ।

महादोषात्प्रमुच्यते ॥

महापापात् प्रमुच्यते ।

स सर्वविद्भवति स सर्वविद्भवति ॥

य एवं वेद इत्युपनिषत् ॥ १४ ॥

ashtau brahmanan samyag-grahayitva surya-varchasvi bhavati |
suryagrihe mahanadyam pratima-sannidhau va japtva siddhamantro bhavati ||
mahavighnat-pramuchyate |
mahadoshat-pramuchyate ||
mahapapat pramuchyate |
sa sarvavid-bhavati sa sarvavid-bhavati ||
ya evam veda ityupanishat || 14 ||

॥ शान्ति मन्त्र ॥

|| shanti mantra ||

ॐ सहनाववतु ।

सहनौभुनक्तु ॥

सह वीर्यं करवावहै ।

तेजस्विनावधीतमस्तु मा विद्विषावहै ॥

ॐ भद्रं कर्णेभिः शृणुयाम देवाः ।

भद्रं पश्येमाक्षभिर्यजत्राः ॥

स्थिरैरङ्गैस्तुष्टुवांसस्तनूभिः ।

व्यशेम देवहितं यदायुः ॥

ॐ स्वस्ति न इन्द्रो वृद्धश्रवाः ।

स्वस्ति नः पूषा विश्ववेदाः ॥

स्वस्तिनस्तार्क्ष्यो अरिष्टनेमिः ।

स्वस्ति नो बृहस्पतिर्दधातु ॥

om sahanavavatu |

sahanaubhunaktu ||
saha viryam karavavahai |
tejasvinavadhitamastu ma vidvishavahai ||
om bhadram karnebhih shrinuyama devah |
bhadram pashyemakshabhiryajatrah ||
sthirairangaistushtuvansastanubhih |
vyashema devahitam yadayuh ||
om svasti na indro vriddhashravah |
svasti nah pusha vishvavedah ||
svastinastarkshyo arishtanemih |
svasti no brihaspatirdadhatu ||

ॐ शान्तिः शान्तिः शान्तिः ॥

॥ इति श्रीगणपत्यथर्वशीर्षं समाप्तम् ॥

om shantih shantih shantih ||

|| iti shriganapatyatharvashirsham samaptam ||